Original Gujarati Poem "કાંઈ ખોયું નથી" of the English translation "Nothing is lost" posted below by Dr. Ashok DB Vaidya

કાંઈ ખોયું નથી  

કાંઈ ખોયું નથી:

તેં હજી ભાઈ, ભરપૂર ભીતર તણું 

પાત્ર જોયું  નથી. 

વાસનાની  જ તારી બધી વેદના,

ભય બતાવે તને ભૂત  સૌ ભેદનાં,

તેં જ મનની હજી કાચ-બારી તણું

દ્વાર ધોયું  નથી,

કાંઈ ખોયું  નથી. 

પૃથ્વી  તો લ્હેરથી જાય તરતી  નભે,

ને અલ્યા, ભાર લાગે તને કાં ખભે?

તેં જ તારું હજી  આત્મનું અવનિમાં 

બીજ  બોયું નથી,

કાંઈ ખોયું નથી. 

સૃષ્ટિ તો બેય હાથે લૂંટાવી જતી,

તેથી તો છાબ એની ન ખાલી થતી,

એ જ હારી જતું હૈયું જેણે બધે

હેત ટોયું નથી,

કાંઈ ખોયું નથી. 

૧૧-૧૨-'૫૮  

કોઈ ઘટમાં  ગહેકે  ઘેરું, મકરન્દ દવે, સમગ્ર કવિતા- ૧, ૨૮૮- ૨૮૯.